I dërguari i Posaçëm i SHBA-së për Ballkanin Perëndimor, Gabriel Escobar, ka shprehur haptazi mbështetjen ndaj kryetarit demokrat Lulzim Basha. Ai tha sot për mediat se e ka ftuar Bashën në Uashington për një vizitë zyrtare.
Kjo ftesë vjen edhe pas deklaratave të ndryshme se kryedemokrati nuk e kalon dot oqeanin, dhe se mund të mos e marrë vizën. Gabriel Escobar tha për mediat se lufta kundër korrupsionit duhet të jetë një angazhim i vazhdueshëm i institucioneve shqiptare.
“Jam i kënaqur që ndodhem këtu në Tiranë. Është vizita e parë dhe më kanë mikpritur shumë mirë. Isha i lumtur që u takova me opozitën. Na shprehën angazhimin e tyre ndaj NATO-s dhe BE-së, si dhe luftën kundër korrupsionit. Do të jetë e nevojshme angazhimi i institucioneve për ta bërë realitet. Pres me kënaqësi të zhvillojë bisedime të tjera gjatë pasdites, dhe shpresoj që ta takoj sa më shpejt z. Basha në Uashington”, deklaroi Escobar.
Kreu i PD-së, Lulzim Basha deklaroi se interesi i PD-së është lufta kundër korrupsionit, angazhim i marrë edhe nga aleati strategjik i vendit tonë. Basha mirëpriti ftesën e Escobar për vizitë në Uashington, teksa tha se po e planifikon atë së shpejti.
“Ishte kënaqësi e veçantë të mirëpres sot përfaqësuesin e lartë të SHBA-së. Lufta kundër korrupsionit është përcaktuar si interes kombëtar i SHBA-së, është dhe më shumë interes kombëtar i Shqipërisë, ajo për të cilën PD ka luftuar dhe është përpjekur më shumë se çdo gjë tjetër këto tetë vite.
Te ligji për SPAK dhe BKH, iniciativa për Vettingun e politikanëve, dëshmojnë se PD ka qenë dhe mbetet e vendosur në luftën kundër korrupsionit që është kyçi për zgjidhjen e problemeve që ka Shqipëria sot. Betejat e PD-së kanë qenë këto dhe është kënaqësi e jashtëzakonshme të shohim një rikthim në SHBA në Ballkan dhe Shqipëri të një beteje që e kemi luftuar prej vitesh.
Diskutuam për të gjitha çështjet e aktualitetit në vend edhe në rajon. Bëra të qartë qëndrimin e PD-së për pacenueshmërinë e integritetit territorial të Kosovës. Në këtë qëndrim që paraqita, kam marrë mbështetjen dhe mirëkuptimin e plotë të Escobar. Diskutuam edhe për ecjen përpara të drejtësisë, ku kyç është dënimi i politikanëve të korruptuar.
Çështja e pandëshkueshmërisë sikundër politikat e sanksioneve “non grata”, ishin pjesë e diskutimeve ndërsa për vendimet e departamentit të shtetit do të dëgjoni nga vetë Escobar. Ftesë për në Uashington e mirëpres, dhe padiskutim po planifikoj një vizitë për në Uashington”, tha Basha.
