I dërguari i SHBA për Ballkanin Perëndimor, Gabriel Escobar, vjen në Tiranë me një agjendë të qartë kundër korrupsionit të politikanëve shqiptarë. Ambasada e SHBA-së në Shqipëri ka zbardhur dje agjendën e vizitës së Escobar në Tiranë.
Ky i fundit ditën e nesërme do të zhvillojë vizitën e tij të parë në Shqipëri, me qëllim thellimin e bashkëpunimit mes dy vendeve. Ai do të takohet me kryeministrin Edi Rama, kryedemokratin Lulzim Basha, Ministren e Jashtme Olta Xhaçka dhe zyrtarë të tjerë. Ajo që bie në sy në këtë vizitë lidhet me faktin se amerikanët edhe këtë herë kanë anashkaluar presidentin Ilir Meta. Në njoftimin e Ambasadës së SHBA-së, nuk cilësohet emri i presidentit Meta, nëse ai do të zhvillojë një takim me zyrtarin e DASH, Gabriel Escobar, sikundër përmendet Rama apo Basha.
“Më 9 dhjetor, Zëvendës Ndihmës Sekretari i Shtetit i SHBA për Çështjet Europiane dhe Euroaziatike dhe i Dërguari i Posaçëm për Ballkanin Perëndimor Gabriel Escobar do të zhvillojë vizitën e tij të parë në Shqipëri, me qëllimin për të thelluar miqësinë tonë të ngushtë, e mbështetur në vlerat e përbashkëta demokratike.
Escobar do të takohet me Kryeministrin Rama, Ministren e Jashtme Xhaçka, Kryetarin e Partisë Demokratike Basha dhe udhëheqës të tjerë për të rikonfirmuar mbështetjen e palëkundur të Shteteve të Bashkuara për demokracinë e Shqipërisë, integrimin në BE, bashkëpunim më të fortë në mbrojtje dhe mundësi për tregti e investime.
Ashtu siç shkruhet në Urdhrat Ekzekutivë të Presidentit Biden, Escobar do të diskutojë gjithashtu edhe mbi vendosmërinë e Shteteve të Bashkuara për të luftuar korrupsionin, pandëshkueshmërinë dhe përpjekjet për të minuar demokracinë në Ballkanin Perëndimor”, thuhet në njoftimin e Ambasadës së SHBA.
