Regjisori Kastriot Çipi, përmes një statusi në ‘Facebook’ shkruan se do të padisë Erion Veliajn për shpifje.
Veliaj, mbrëmjen e djeshme në emisionin ‘Opinion’ e ka quajtur regjisorin ‘hajdut’, dhe për këtë arsye, sipas regjisorit Veliaj duhet të japë llogari në gjykatë.
“Ti e humbe durimin dhe bëre gabimin fatal: shpife për mua me emër e mbiemër dhe jo vetëm kaq, por përdore fjalët “dënim penal”, “vjedhje”, “hajdut” etj. Tani do të të duhet t’i japësh gjykatës prova materiale për të provuar pafajësinë tënde, sepse unë do të të padis për shpifje”, shkruan regjisori.
Ai i ka kujtuar kryebashkiakut të Tiranës se ka gënjyer edhe një vit më parë, në po të njëjtën studio, kur tregonte se “muret e Teatrit kanë asbest dhe se shembjen e tij e kanë sugjeruar specialistët italianë të arkitekturës”.
Ndër të tjera, Çipi thotë se do ta ketë të vështirë në gjykatë e, se ky proces ka gjasa të mbarojë pas 5 apo 10 vjetësh.
“Unë e di se do ta kem të vështirë në gjykatë, sepse “reforma në drejtësi” e babait tënd shpirtëror Soros dhe e vëllait tënd të madh (që të bie ta thërrasësh “Lali”) Rama i ka tredhur gjyqtarët që nuk e kanë kaluar ende vetting-un. E di se ti do ta ankimosh vendimin e shkallës së parë në Apel, e pastaj vendimin e Apelit në Gjykatën e Lartë. E di se ky proces mund të mbarojë pas 5 apo 10 vjetësh, por unë do ta bëj, thjesht për kënaqësinë e spektaklit që pres të shoh në procesin e shkallës së parë”, tha Çipi.
