Presidenti turk, Recep Tayyip Erdogan, pritet të zhvillojë një takim me presidentin rus, Vladimir Putin. Ky njoftim është dhënë nga zyra e presidentit Erdogan, teksa lajmëron se është planifikuar që Erdogan të udhëtojë në Moskë në datën 27 gusht.
Ndër të tjera, në njoftim thuhet se takimi është vendosur pas një telefonate mes dy presidentëve, ku u diskutua për zhvillimet në Siri.
Kremlini ka deklaruar se Putini dhe Erdogani janë pajtuar gjatë bisedës telefonike që do të shtojnë përpjekjet për neutralizimin e situatës në provincën e Idlibit, ku dhuna ka detyruar dhjetëra mijëra persona të ikin nga vendi.
Në konfliktin sirian, Rusia dhe Turqia mbështesin palë të ndryshme. Ankaraja mbështet forcat që janë kundër ushtrisë qeveritare të presidentit sirian Bashar Al-Asadit, ndërsa Rusia ka ndihmuar Asadin, si dhe ka rritur prezencën ushtarake ruse në Siri që prej vitit 2015.
