Në aeroportin e Rinasit kanë mbërritur 1.170 dozat e vaksinës anti-covid të prodhuar nga kompania Pfizer.
Kryeministri Edi Rama së bashku me ministrin e Shtetit për Rindërtimin, Arben Ahmetaj dhe ministren e Shëndetësisë, Ogerta Manastirliu shkuan personalisht për të shikuar procesin në aeroport. Këto vaksina do të përdoren për mjekët dhe infermierët.
Ogerta Manastirliu: ”Do të transportohet direkt në ISHP me protokollin e sigurisë. Do të hapet kutia, do të verifikohet çertifikata dhe do të futen në kutitë e ftohta. Do të ruhen nga policia e shtetit dhe strukturat tona.”
Nga Rinasi, vaksinat do transportohen në Institutin e Shëndetit Publik, të shoqëruara nga makinat e policisë së Shtetit, siç ka ndodhur në të gjitha vendet e Europës.
Më pas nga ISHP-ja, aty ku ruhen në temperaturën -80 gradë, do të bëhet edhe shpërndarja në qendrat e vaksinimit, siç është ‘Air Albania’.
Me 1.170 dozat e reja të marra nga Pfizer, do të vijojë procesi i vaksinimit me mjekët dhe infermierët dhe më pas në shkurt me të moshuarit.
