Era e fortë ka hedhur në tokë dy të rinj, që punonin në çatinë e një banese, duke i lënë me dëmtime të rënda. Ngjarja është shënuar në Sarandë, ku shtetasit 31 dhe 35-vjeç kanë mbetur të plagosur.
Dy punëtorët kanë qenë duke punuar në një çati në fshatin Shelegar, ndërsa era e fortë ka shtyrë llamarinën ku po punonin dhe i ka hedhur të dy në tokë. Dy punëtorët Mehmet Metali, 35-vjeç dhe Sokol Çukari, 31-vjeç janë transportuar në urgjencën “Stefan Mekshi” në Sarandë, ku një prej tyre i është nënshtruar një operacioni.
Sokol Çukari ka kryer një operacion në këmbë, ndërkohë që 35-vjeçari Metali, për shkak të dëmtimeve në shtyllën kurrizore është transportuar me helikopter drejt spitalit të Traumës në Tiranë.
“Në orën 14:30, në spitalin e Sarandës janë paraqitur për të marrë ndihmë mjekësore, jashtë rrezikut për jetën, shtetasit S. Ç., 31 vjeç dhe M. M., 35 vjeç, të cilët dyshohen se janë rrëzuar aksidentalisht nga një objekt, ku po kryenin riparime në fshatin Shelegar, Sarandë”, njofton policia. Grupi hetimor ndodhet në vendngjarje, dhe po punon për sqarimin e rrethanave të ngjarjes.
