Epidemiologu Dritan Ulqinaku e cilëson të nevojshme masën e ndërmarrë për mbajten e maskave në ambiente të hapura, duke kujtuar faktin se kapacitetet në spital nuk mund të përballojnë dot më një fluks të shtuar. Kryeministri Edi Rama, gjatë një konference për mediat së bashku me ministren e Shëndetësisë, Ogerta Manastirliu, paraqiti masat anti-COVID të marra nga qeveria, me qëllim përballimin e sfidës vjeshtë-dimër ku vendosja e maskës do të jetë me detyrim në çdo ambient.
Në një intervistë për ‘Euronews Albania’, ai tha se masa e marrë është e drejtë, duke qenë se Shqipëria po futet në një stinë, ku risku i infektimeve është shumë i lartë.
“Shikojeni si një gjest reflektimi, për të mos kaluar në gjëra të tjera të cilat mund të na pengojnë aktivitetet fizike dhe mentale të jetës tonë të përditshme”, u shpreh Ulqinaku.
Mjeku sqaroi gjithashtu se edhe për njerëzit e sëmurë të cilët kanë probleme të ndryshme sa i përket furnizimit me oksigjen, mbajtja e maskës nuk përbën problem, dhe nuk ka asnjë efekt negativ.
Së fundmi Dritan Ulqinaku tha se situata që po kalohet momentalisht është sfida e fundit me të cilën po përballemi, dhe shpreson se do ta kalojmë me sukses.
“Shpresoj t’ia dalim, por që momentalisht (situata) nuk është e favorshme. Unë në studion tuaj e kam deklaruar se afrimi i stinës së shirave, bën që njerëzit të grumbullohen në makina, në ambiente të mbyllura dhe rrit shumë transmetueshmërinë që reflektohet në shifrat e të paktën javës së fundit”, përfundoi mjeku.
