Policia në Berat ka arrestuar një 44-vjeçar i cili kishte vjedhur 10 milionë lekë nga kompania ku punonte.
Sipas policisë, Gentian Mahmutaj e ka fshehur këtë vjedhje duke inskenuar një grabitje. 44-vjeçari i cili punonte në një kompani që tregton xhama kishte shkuar për të mbledhur detyrimet tek disa klientë të kompanisë, që kapnin vlerën e lartpërmendur.
Por tek pronari i firmës ai ka deklaruar se disa persona të panjohur i kanë prerë rrugën dhe i kanë vjedhur shumën. Pas denoncimit në polici, është zbuluar se Mahmutaj kishte sajuar grabitjen. Policia raporton se shuma e parave iu zbulua e fshehur në banesën e tij.
Njoftimi i policisë:
Nga Specialistët e Seksionit për Krimet u bë arrestimi në flagrancë i shtetasit:
G.M, 44 vjeç, banues në lagjen Kushtrim. Arrestimi i tij u bë pasi dyshohet se ka vjedhur shumën prej 1 milion lekë të reja, në automjetin e shtetasit R.K. Shuma prej 1 milion lekë, u sekuestrua në cilësinë e provës materiale.
Materialet i kaluan Prokurorisë së Rrethit Gjyqësor Berat për veprën penale “Vjedhja”, parashikuar nga neni 134/3 i Kodit Penal.
