Një shqiptar është arrestuar në Angli, pasi u kap mat teksa kujdesej për kanabis të mbjellë në dy shtëpi në Angli.
I arrestuari është 46-vjeçari Bashkim Hajdari, i cili ka hyrë ilegalisht nga Evropa në Cheltenham. Ai u arrestua më 4 shkurt dhe po mbahet në paraburgim, ndërsa avokati i tij mbrojtës ka thënë se i pandehuri kishte pranuar përfshirjen e tij në prodhimin e drogës së klasës B.
Shqiptari kishte treguar se ishte dërguar në adresën në Cheltenham nga një burrë në Belgjikë, i cili i kishte thënë të kujdesej për bimët e kanabisit, por pa i dhënë asnjë pagesë. Sipas informacioneve të para, ai ishte përfshirë në prodhimin e kanabisit që nga nëntori i vitit të kaluar.
Hajdari po mbahet në burg, ndërkohë që seanca u shty për në 13 shkurt. Droga e kapur në dy banesat për të cilat kujdesej shqiptari, besohet të jetë rreth £300,000.
