Policia bën me dije se ka identifikuar dhe ndaluar personin përgjegjës për hedhjen e shashkave gjatë protestës, të cilët lënduan edhe disa prej të pranishmëve.
Sipas policisë, bëhet fjalë për 49-vjeçarin Arben Qyrani, me banim tek Unaza e Re, Tiranë. Si pasojë e hedhjes së lëndëve piroteknike, pati dy persona të lënduar, njëra prej tyre gazetare.
I akuzuari është proceduar edhe më parë nga policia për “Tubim të paligjshëm” në vitin 2018.
Njoftimi i policisë:
Policia e Shtetit ka identifikuar dhe ndaluar 49-vjeçarin Arben Qyrani, me banim tek Unaza e Re, Tiranë, autori i hedhjes së lëndëve pirotenike në tubimin e sotëm.
Për pasojë pati 2 shtetase të lënduara, nga lënda plasëse, jashtë rrezikut për jetën. Pasi hodhi lëndët piroteknike mes turmës, i ndihmuar nga persona të tjerë, të identifikuar tashmë nga Policia, ai doli nga turma. Agjentët e policisë e ndoqën dhe e ndaluan pak metra larg sheshit ku opozita mbante tubimin.
Qyrani është i proceduar edhe më herët për “Tubim të paligjshëm” në vitin 2018, në zonën e Unazës së Re, në Tiranë.
