Policia njoftoi sot se janë ndëshkuar me masë administrative 47 persona që ishin mbledhur në mbrojtje të Teatrit Kombëtar, jashtë fashës orare të lejuar.
Mësohet se në mesin e të ndëshkuarve me gjobë dhe heqje patente janë edhe disa nga figurat më të njohura të LSI-së, duke filluar nga kryetarja Monika Kryemadhi; ish-deputeti, Luan Rama; nënkryetari Petrit Vasili, si dhe ish-deputeti Endrit Braimllari.
Ndërkohë nga PD janë gjobitur ish-deputeti Edmond Spaho, ish-deputeti Klevis Balliu, si dhe kreu i FRPD-së, Belind Këlliçi.
Ata janë gjobitur për shkak se kanë shkelur fashën orare të vendosur nga qeveria për ndalim lëvizjeje pa autorizim në zonat e kuqe. Sipas policisë, ata janë konstatuar në harkun kohor 20:00 – 24:00, bashkë me një grup qytetarësh të grumbulluar pranë Teatrit Kombëtar.
Njoftimi i Policisë:
Policia e Tiranës, në vijim të monitorimit për zbatimin e masave kufizuese të përcaktuara në Aktin Normativ Nr. 3, datë 15.03.2020 “Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga COVID-19”, gjatë kontrolleve të zhvilluara mbrëmjen e djeshme, pas orës 17:30, fashë orare e përcaktuar për ndalim lëvizjeje pa autorizim në zonat e kuqe, ka konstatuar në harkun kohor 20:00 – 24:00, një grup qytetarësh të grumbulluar pranë Teatrit Kombëtar.
Në zbatim të Aktit Normativ, shërbimet e Policisë kanë proceduar me masat administrative përkatëse, gjobë dhe tërheqje të lejes së drejtimit, shtetasit:
M.K., K. B., L. R., E. B., E. S., P. V., B. K., K. Xh., S. L., S. K., R. K., B. Ç., B. T., E. H., E. Sh., B. B., G. Sh., A. F., A. K., A. K., J. Sh., I. G., L. S., A. Q., B. I., F. Xh., D. B., E. M., D. A., A. K., S. B., G. S., G. B., D. T., A. S., L. B., A. D., Sh. M., M., Sh., R. D., R. B., R. Ç., A. H., D. D., B. L., F. Xh. dhe B. I.
Nisur nga shkeljet e evidentuara ditët e fundit në zonat e kuqe, Policia e Shtetit apelon edhe njëherë për të gjithë qytetarët, sidomos ata në zonat e kuqe që të respektojnë me rigorozitet oraret e lëvizjes dhe distancimin social dhe në këtë kuadër kërkon mirëkuptimin dhe ndihmën e qytetarëve në të gjithë vendin, që të kontribuojë secili në mbrojtjen e shëndetit nga kërcënimi i virusit vdekjeprurës COVID-19.
Policia e Shtetit siguron qyettarët se është angazhuar maksimalisht në zbatim të ligjit, në mbrojtje të jetës dhe të rendit publik në kushtet e jashtëzakonshme të fatkeqësisë natyrore.
