Zbardhen identitetet e dy personave të cilët mbetën të plagosur me armë zjarri , mbrëmjen e sotme në kryeqytet. 32-vjeçari Altin Gjoka dhe 28-vjeçari Jetmir Marashi janë dy të rinjtë e plagosur, në një lokal në rrugën ”Todi Shkurti”.
Gjoka është plagosur në shpatull ndërsa Marashi ka marrë plagë në gjoks, teksa janë dërguar në spitalin e Traumës, ku ndodhen jashtë rrezikut për jetën.
Nuk dihet lidhja e dy personave të plagosur me njëri-tjetrin, apo nëse të dy ata ishin të përfshirë në konflikt.
Nuk ka ende një zbardhje të plotë të dinamikës së kësaj ngjarje, por paraprakisht dyshohet se të rinjtë janë përplasur me makinë, gjë ka çuar në një përplasje, fillimisht verbale mes tyre, por që më pas u nxorën armët. Pas ngjarjes, autori, i cili është identifikuar nga policia dhe po punohet për kapjen e tij, është larguar me makinë.
Çfarë njoftoi policia
Tiranë/Informacion paraprak
Më datë 24.07.2021, rreth orës 20:30, në rrugën “Todi Shkurti” , dyshohet se gjatë një konflikti të çastit janë plagosur me armë zjarri shtetasit A. Gj., 32 vjeç dhe J. M., 28 vjeç, të cilët u dërguan në spital dhe ndodhen nën kujdesin e mjekëve. Shërbimet e Policisë kanë bërë rrethimin e zonës dhe identifikimin e autorit të dyshuar, i cili për shkak të hetimit nuk bëhen të ditura gjeneralitet e tij. Grupi hetimor ndodhet në vendngjarje dhe po punon për sqarimin e plotë të rrethanave të ngjarjes dhe kapjen e autorit.
