Komisioni i Rithemelimit i Kuvendit të 11 dhjetorit, do të mbajë nesër referendum për shkarkimin e Lulzim Bashës si kryetar të kësaj force. Ky Komision ka zgjedhur anëtarët që do të organizojë referendumin e së shtunës.
Komisioni i Organizimit dhe Kontrollit të Operacioneve Elektorale përbëhet nga Albana Vokshi në cilësinë e kryetares dhe anëtarët Ervin Minarolli, Enno Bozdo, Edhith Harxhi dhe Keltis Kruja.
Komisioni ka për detyrë të organizojë, mbikqyrë dhe drejtojë referendumin deri në shpalljen e rezultatit përfundimtar.
Po nesër, kryetari i PD-së Lulzim Basha do të mbajë Kuvendin Kombëtar.
Kujtojmë këtu se pas vendimit të Bashës, Berisha iu rikthye aktivitetit të tij politik, duke nisur takimet me bazën që i quajti “Foltore”. Më 11 dhjetor, Kuvendi i thirrur nga ish-kryeministri Sali Berisha votoi me 4446 fleta pro shkarkimit të Bashës. Gjithashtu u ngrit edhe një grup Komisioni i Përkohshëm me 29 anëtarët për të nisur të gjitha procedurat e nevojshme. Basha nuk e njeh vendimin, duke përjashtuar nga një mbledhje nga Këshilli Kombëtar i PD-së, të gjithë mbështetësit e Berishës, duke i zëvendësuar të gjithë anëtarët e Kryesisë.
