Duket sikur nuk kanë fund ngjarjet kriminale në vend. Pak pas atentatit në Vlorë ku u vra një 35-vjeçar në derë të shtëpisë, një vrasje ka ndodhur në Lushnje.
62-vjeçari Rako Qorri është qëlluar me armë zjarri, duke u lënë i vdekur në vend në banakun e lokalit të tij, ndërsa ka mbetur i plagosur djali i tij.
Kejdi Qorri, 31-vjeç, ndodhet në spital në gjendje të rëndë.
Ngjarja e rëndë ka ndodhur rreth orës 23:47, në fshatin Fier i Ri në Lushnje. Mësohet se Sofokli Shani, banues në fshatin Krutje e Sipërme qëlloi me automatik në lokalin e tyre Rako Qorrin, 62-vjeç dhe të birin, Kejdi Qorrin, 31-vjeç.
Ka dyshime që autori dhe viktima të jenë zënë si fillim në lokal, dhe më pas ky i fundit ka qëlluar ndaj tyre me breshëri automatiku. Pas krimit, djali është transportuar në spitalin e Lushnjes, dhe më pas në Tiranë, pasi ndodhet në gjendje të rëndë për jetën.
Njoftimi i policisë:
Kapet nga policia disa minuta pas kryerjes së krimit autori i vrasjes së 62-vjeçarit dhe plagosjes së djalit të tij në fshatin Fier i Ri, Lushnje. Në datë 02.06.2021, rreth orës 23:47, në fshatin Fier i Ri, Lushnjë, shtetasi S.Sh, si pasojë e një konflikti të çastit në lokalin në pronësi të shtetasit R. Q., ka vrarë me armë zjarri shtetasin R. Q., 62 vjeç dhe ka plagosur djalin e tij, shtetasin K. Q., 31 vjeç, i cili ndodhet në spitalin e Lushnjes nën kujdesin e mjekëve.
Menjëherë shërbimet e Komisariatit të Policisë Lushnje, kanë shkuar në vendngjarje dhe falë reagimit në kohë dhe punës së mirëorganizuar, bënë të mundur kapjen e autorit të dyshuar të ngjarjes, shtetasin S. Sh., 57-vjeç, banues në fshatin Krutje e Sipërme.
