Më herët, sot policia shtetit njoftoi arrestimin e një 47 vjeçari për llogari të shtetit grek. Ndaj tij rëndonin një numër i madh akuzash, që nga vrasja dhe deri te trafikimi i lëndëve narkotike. Në vijim janë zbardhur detaje të tjera mbi operacionin e policisë.
Sipas “Panoramës” personi i arrestuar është identifikuar me emrin Bardhosh Mino. Ai akuzohet për vrasjen e dy turistëve anglezë në Patra në vitin 1998. Për këtë ngjarje ndaj tij ka një dënim me burgim të përjetshëm.
Përpos kësaj, ai është dënuar edhe me 6 vjet burg nga gjykata e Kretës për trafik të lëndëve narkotike. Ai është arratisur nga burgu në Greqi ku vuante dënimin e përjetshëm.
NJOFTIMI
Në zbatimin e planit të masave për kapjen e personave në kerkim, bazuar në informacione të marra në rrugë operative, Sektori i Hetimit te Krimeve në bashkëpunim me Forcat Operacionale në DVP Vlorë, kanë finalizuar operacionin “Bianco” mbi bazën e të cilit është bërë kapja dhe ndalimi i shtetasit në kërkim:
B.M (L), 47 vjeç, banues në Vlorë.
Ky shtetas ishte shpallur në kërkim në Shtator të vitit 2019, pasi Prokuroria Vlorë ka dërguar urdhërin për ekzekutimin e vendimit penal nr.196, datë 06.08.2019 të Gjykatës së Rrethit Gjyqësor Vlorë, mbështetur edhe nga të dhënat e dërguara nga shteti Grek, ka vendosur masën e sigurisë “Arrest në burg” për veprat penale:
“Vrasje me dashje, kryer në bashkëpunim”, “Grabitje në bashkëpunim”, “Armëmbajtje pa leje”, “Përdorim i paligjshëm i armës”, “Zotërim dhe transportim i një sasie të madhe të lëndëve narkotike”, dhe “Falsifikim”, të parashikuara sipas kodit Penal të shtetit Grek.
Materialet procedurale u referuan në Prokurorinë e Vlorës për veprime të mëtejshme.
