Pilot (Rakip) Rroli u ekzekutua mëngjesin e sotëm. Biznesmeni njihej me dy emra, pasi burimet thanë se ai nga Rakip, e ka ndryshuar emrin në Pilot pas një ngjarje ku është përfshirë në vitin 2011, për rrahjen e plagosjen me sende të forta të një 22-vjeçari.
55-vjeçari i cili u ekzekutua me breshëri plumbash në Sanxhak të Laçit, ka humbur kontrollin e automjetit të tij tip Audi në momentin e atentatit. Mjeti i biznesmenit është “shpuar” tej për tej nga plumbat, pasi autorët duket se janë siguruar mirë që ai të vdiste.
Rakip Rroli u ekzekutua mëngjesin e sotëm në periferi të Laçit, teksa po lëvizje me mjetin e tij, një “Audi Q7” me targa AA 001 PB. Makina është qëlluar nga autorët në pjesën e djathtë, dhe të dy xhamat janë bërë copë nga plumbat. Dyshohet se vrasja ka ndodhur për konflikte të mëparshme.
Atentat i mirëorganizuar?
Ngjarja dyshohet të jetë një atentat i mirëorganizuar. Viktima po udhëtonte me automjetin e tij në zonën e Sanxhakut, kur autorët e kanë qëlluar me një breshëri automatiku, duke e lënë të vdekur në vend. Autorët kanë ruajtur dhe ndjekur objektivin që sapo ka dalë nga banesa dhe është futur në rrugën që lidh fshatin Sanxhak me Kurbinin. Aty e kanë qëlluar me breshëri kallashnikovi.
