Laçi është tronditur këtë mëngjes nga një atentat në zonën e quajtur Sanxhak. Nga të shtënat me armë ka ndërruar jetë biznesmeni 55-vjeçar, Pilot Rroli. Ai njihej dhe me emrin Rakip Rroli. Viktima ishte duke udhëtuar me mjetin e tij ku është qëlluar me armë, në rrethana ende të paqarta.
Burimet zyrtare bëjnë me dije se në ndihmë të policisë lokale janë nisur grupe të FNSH-së, dhe një grup i posaçëm hetimor për të bërë të mundur zbardhjen e plotë të rrethanave të ngjarjes, identifikimin dhe kapjen e autorëve.
Biznesmeni Pilot Rroli, ka qenë i dënuar disa vite më parë. Mësohet se ai ka vuajtur dënimin në burgun e Shënkollit dhe pas lirimit është marrë me biznes. Ai kishte në pronësi një firmë për përpunimin e drurit në qytetin e Laçit.
55-vjeçari ka qenë duke udhëtuar mëngjesin e sotëm me mjetin e tij, dhe ka rënë pre e atentatit ne vendin e quajtur Sanxhak.
Njoftimi i policisë
Rreth orës 08:45, në Sanxhak, Kurbin, në rrethana ende të paqarta është vrarë me armë zjarri shtetasi P.Rr, i cili po udhëtonte me automjetin e tij.
Shërbimet e Policisë kanë rrethuar zonën, si dhe janë ngritur pika kontrolli, me qëllim kapjen e autorit.
Në ndihmë të Policisë lokale janë nisur grupe të FNSH-së dhe një grup i posaçëm hetimor për të bërë të mundur zbardhjen e plotë të rrethanave të ngjarjes, identifikimin dhe kapjen e autorëve”.
