Eksperti i njohur i shëndetit publik, Erion Dasho, është i mendimit se situata me pandeminë në Shqipëri, është jashtë kontrollit. Ai tha në një intervistë për A2 se ne kemi spitale si qendra të transmetimit të infeksionit, administrata apo edhe transporti publik nuk zbatojnë protokollet e sigurisë.
“Prej kohësh, mua situata nuk më është dukur nën kontroll. Të pasurit e situatës nën kontroll vlerësohet duke parë disa mjedise të caktuara.
Në një situatë nën kontroll, siç është në disa vende në Europë, nuk kemi transmetim të koronavirusit në spitale apo në institucione shëndetësore ashtu siç në Shqipëri konstatohet. Ne kemi spitale si qendra të transmetimit të infeksionit, administrata apo edhe transporti publik ku nuk zbatohen protokollet e sigurisë. Në këto kushte, unë do ta quaja pandeminë në Shqipëri jashtë kontrollit dhe nën mëshirën e virusit”, shprehet eksperti.
Dasho ngre alarmin për rritjen e numrit të viktimave, duke e krahasuar atë edhe me Italinë. Duke bërë një bilanc të situatës, Erion Dasho tha se në 3 ditët e fundit kanë ndërruar jetë 15 persona, me një mesatare prej 5 personash në ditë.
“Ditët e fundit vihet re një tendencë shumë shqetësuese. Vihet re një rritje e numrit të personave që e humbasin jetën. Në 3 ditët e fundit kanë ndërruar jetë 15 persona, me një mesatare prej 5 personash në ditë, po kaq e ka pasur edhe Italia, por e dimë të gjithë se nga vjen Italia. Atje ku ka persona me javë të tëra në intubim. Po ashtu, këto shifra në Itali janë në raport me 700-800 të shtruar, ndërsa ne kemi 5 humbje jete në raport me 120 të shtruar. Kjo tregon se jemi duke bërë diçka jo siç duhet në raport me trajtimin”, shprehet eksperti.
