SPAK ka rekomanduar Aida Hajnaj për pozicionin e drejtueses së Byrosë Kombëtarë të Hetimit.
Sipas SPAK-ut, Hajnaj ishte e vetmja nga kandidaturat që i plotësonte kriteret e kërkuara. Kjo e fundit ka një eksperiencë të gjatë në polici.
Ajo ka ushtruar detyrën e shefes së sektorit për Hetimin e Pastrimit të Parave në Drejtorinë për Hetimin e Krimit Ekonomik e Financiar dhe Drejtore e Përgjithshme e Shërbimit të Çështjeve të Brendshme dhe Ankesave (SHÇBA) në Ministrinë e Brendshme.
Më pas u emërua nga ministri i atëhershëm Fatmir Xhafaj si drejtuese e Drejtorisë për kufirin dhe Migracionin.
Më 15 shkurt të vitit 2018, Hajnaj u prezantua nga Drejtori i Përgjithshëm i Policisë, Ardi Veliu, si zëvendëse e tij.
Kandidatët e tjerë për këtë post ishin Artur Beu, Ervin Hodaj dhe Idajet Faskaj. Këta të fundit u skualifikuan nga gara pasi sipas verifikimeve të kryera nuk i përmbushën të gjitha kriteret.
KLP do të mblidhet të enjten për të votuar që Hajnaj të marrë drejtimin e një prej institucioneve më të rëndësishme të luftës kundër korrupsionit.
