Nënkryetari i PD-së, Edmond Spaho ka komentuar përgjigjen e kryeministrit Rama, për akuzat e opozitës.
Përmes një postimi në Facebook, Spaho e cilëson përgjigjen e tij si një tallje, teksa i bën thirrje të publikojë kontratat e tenderave sekretë.
Sipas tij, shqiptarët ende nuk kanë marrë ndihmën që qeveria ka për detyrim t’iu japë. Spaho akuzon qeverinë se nuk ka ndër mend të merret me hallet e shqiptarëve, por sipas tij halli i vetëm i tyre është ruajtja e parave të oligarkëve.
Postimi i plotë:
Rama dhe qeveria e tij vazhdojnë të tallen dhe të përqeshin shqiptarët.
Në ditët më të vështira për qytetarët, ai harxhon kohën për të bërë montuar video dhe aktruar si klloun.
Në fakt i mjaftojnë 2 minuta që të publikojë kontratat e tenderave sekretë. Kaq mjafton që t’u përgjigjet seriozisht denoncimeve të PD dhe të mediave dhe që shqiptarët të njihen me vjedhjen që kryeministri dhe qeveria e tij kanë bërë dhe në këto kohë krize.
Shqiptarët sot nuk kanë marrë ende ndihmën që qeveria ka për detyrim ligjor t’ua japë. Varfëria kërcënon çdo ditë e më shumë familjet dhe zbraz tavolinat e shqiptarëve. Bizneset po falimentojnë dhe papunësia po rritet çdo ditë. Por Edi Rama dhe qeveria e tij nuk e kanë fare në plan të merren me hallet e shqiptarëve. Halli i tyre i vetëm është të ruajnë paratë e oligarkëve.
Shqiptarët vuajnë, ekonomia vuan, Edi Rama bën kllounin dhe sulmon opozitën për të fshehur varfërinë dhe krizën ekonomike që po pllakos çdo ditë e më shumë mbi qytetarët dhe Shqipërinë.
