Tirana ndjehet e gatshme për t’u anëtarësuar në BE, ndërsa e sheh Unionin e ri të Ballkanit Perëndimor, si një frenim të mundshëm të këtij procesi
Athinë-Kur të shtunën e kaluar u mblodh parlamenti i ri shqiptar, Edi Rama, kryeministri i vjetër dhe i ri i Shqipërisë, kishte çdo arsye për t’u ndjerë i kënaqur. Nga njëra anë, Rama, pas fitores së qartë në zgjedhjet e fundit parlamentare të socialistëve të tij (Partisë Socialiste), ishte në gjendje të formonte i vetëm qeverinë, duke fituar 74 nga 140 vende në parlament.
Nga ana tjetër, 80 deputetë votuan të shtunën për kandidatin socialist si kryetarin e ri të parlamentit, duke përfshirë edhe dy dezertorë nga opozita e djathtë. Por mbi të gjitha Rama mund të ngrejë zërin ndaj Komisionit Evropian, se kandidatura e Shqipërisë për t’u anëtarësuar në union është politikisht e qëndrueshme dhe se Tirana është gati të fillojë sa më shpejt negociatat e pranimit.
Ndonëse zgjerimi i BE-së, është aktualisht i pezulluar, negociatat po vazhdojnë me kandidatët e tjerë të Ballkanit Perëndimor. Nga ana tjetër, Shqipërisë u kthye mbrapsht në dhomën e pritjes vitin e kaluar – ndër të tjera edhe për provën e “pjekurisë” të zgjedhjeve parlamentare.
Për rrethanat shqiptare, ato u zhvilluan jashtëzakonisht të qeta. Dhe ndërkohë, edhe zhurma e krijuar nga presidenti i ri i vendit, Ilir Meta, në fundin e legjislaturës së kaluar mbi standardin e zgjedhjeve, kaloi pa ndonjë problem të madh.
Kritika të hapura ndaj sistemit të drejtësisë
Shkëndija demokratike duket se kanë ekzistuar prej kohësh në këtë vend. Por, Komisioni i BE-së gjithashtu ka edhe një listë të gjatë kritikash si ato mbi pavarësinë e gjykatave apo luftën kundër krimit të organizuar, pas lulëzimit të trafikimit të drogës vitet e fundit.
Tek e fundit, komisioneri i BE Johannes Hahn, përgjegjës për fqinjësinë e mirë dhe zgjerimin, ka shprehur kohët e fundit një opinion shumë pozitiv mbi zhvillimet në Shqipëri.
I ftuar i një takimi jozyrtar të 6 kryeministrave të Ballkanit Perëndimor në qytetin bregdetar të Durrësi në fundin e muajit gusht, ai vlerësoi Shqipërinë për zgjedhjet” e qarta dhe transparente”. “Në përgjithësi”- thotë ai “shoh përparim”. Dhe kjo është pikërisht ajo që dëshiron lidershipi shqiptar: një opinion pozitiv në raport-progresin e ardhshëm të Komisionit Evropian.
Megjithatë, vende si Gjermania, kanë ende llogari të hapura me Shqipërinë. Për shembull, jo më pak se 54.000 shqiptarë kërkuan azil në Gjermani në vitin 2015 – një keqpërdorim i dukshëm i regjimit të udhëtimit pa viza që është në fuqi që prej vitit 2010. Edhe pse situata që atëherë është qetësuar, dhe vetë Shqipëria i ka frenuar qytetarët e saj nga kërkimi i azilit – reputacioni i keq ka mbetur.
Së fundmi, u bë e qartë se shumë shqiptarë tani po përpiqen të kërkojnë tashmë azil në Francë. Vështirë se ndokush ka përmendur dhjetëra mijëra shqiptarët e gjeneratave të dyta dhe të treta në vendet fqinje të Italisë dhe Greqisë. Ata dëshmojnë, se emigrantët shqiptarë janë të aftë të përshtaten dhe të integrohen.
Në Shqipëri, projekti i ri i preferuar i BE-së në Ballkan, bashkimi ekonomik i Ballkanit Perëndimor, për të cilin u diskutua së fundmi edhe në Durrës, përbën një burim mosbesimi. Shqipëria zyrtare është prapa projektit, i cili gjithashtu quhet edhe Procesi i Berlinit, i konkretizuar në Trieste në korrikun e këtij viti, me 115 projekte konkrete në kuadër të integrimit.
Për këtë ka argumente të forta, sikurse është infrastruktura ndërkufitare e avashtë apo tregu i dobët në rajon. Disa – madje edhe brenda qeverisë – druhen se ky projekt do ta mbajë Shqipërinë për një kohë të gjatë larg BE-së. Të tjerët kanë shqetësime të tjera. Ata kanë frikë se një “union i vogël” i Ballkanit Perëndimor, do të dominohej nga një Serbia ekonomikisht më e fuqishme.
Shkrihet Ministria e Integrimit
Megjithatë, përkundër përpjekjeve për të pasur një qasje të shpejtë në BE, ka ndodhur sigurisht edhe një ristrukturim i ministrive. Në Tiranë, Ministria e Integrimit Evropian është shkrirë në fillim të legjislaturës së re, për të krijuar një ministri të veçantë për diasporën shqiptare. Ministria do të drejtohet nga një emër i njohur: Pandeli Majko, kryeministri i Shqipërisë gjatë Luftës së Kosovës në vitin 1999.
Përshtati për Tirana Today, Alket Goce
