Kryeministri Edi Rama tha nga Belshi, ku prezantoi kandidatin për zgjedhjet vendore të 30 qershorit, se opozita ka frikë të futet në zgjedhje pasi i trembet rezultatit të tyre. Rama solli dhe njëherë në vëmendje marrëveshjen e 17 majit, teksa u shpreh se i është lutur kreut demokrat, Lulzim Basha si Romeo Zhuljetës, për të mirën e vendit.
Po ashtu, kryeministri theksoi se 30 qershori nuk do të shtyhet, ndërsa shtoi më tej se zgjedhjet nuk caktohen nga mazhoranca.
“Kanë panik nga drejtësia. Nuk e kanë dashur reformën kurrë dhe nuk kanë faj me gjithë ato që kanë bërë. Populli thotë mos e urre kundërshtarin se humbet logjikën. Zgjedhjet nuk i caktojmë ne. Ato janë e drejta e njerëzve. Zgjedhjet do mbahen në qershor. Pas 30 qershor do vendoset vija e kuqe ku mbarojnë lojërat dhe ku fillon ligji. Ata thonë të ikë qeveria, dhe të bëjmë një qeveri si e duam ne. Luli do mësojë, bretkosa në Belsh ka, qofte te daja nuk ka. Dy vjet më parë kam heq shumë keq duke iu lut Lulit, i jam lut më shumë se Romeo Zhuljetës. E shpëtova njëherë nga humnera për vendin që të bënte zgjedhje normalisht. Mori të gjitha ato që deshi”, deklaroi Rama.
