Ka reaguar nëna e vogëlushit 7-vjeçar që u godit me thikë për vdekje nga një grua e moshuar 75-vjeçare.
Fatma L., nëna e viktimës, Mërgimit, shprehet për mediat zvicerane se ajo që i ka ndodhur asaj, është më e keqja që mund t’i ndodhë një nëne.
Shkaku i vrasjes së 7-vjeçarit nga një e moshuar në Basel mbetet i paqartë, por dyshohet, siç raporton media zvicerane, ka gjasa që gruaja të ketë qenë “mendërisht e paqëndrueshme”.
“Ne jemi shumë keq. Nuk mund ta besojmë dot se çfarë ka ndodhur. Djali ynë iku përgjithmonë. Vrasësja mori nga unë lulen më të bukur që kisha”, tha nëna me lot në sy.
Ajo shprehet se nuk e di cila ka qenë motivi i vrasjes, si dhe thekson se nuk e njeh autoren e krimit.
“Nuk e njoh fajtoren. Nuk e di kush është. Unë kurrë nuk e kam parë atë. Unë nuk e di pse ajo e ka vrarë djalin tim. E pra, cila mund të jetë arsyeja për një vrasje kaq të kobshme, ndaj një djaloshi vetëm 7 vjeç? Ajo na shkatërroi jetën”, tha Fatma.
Fatma L. u shpreh se ka qenë në spital gjatë kohëve të fundit, pasi ishte sëmurë.
“Mërgimi më ka vizituar në krevat. Ai ishte aq i lumtur “, thotë ajo.
Tani familja do të duhet të varrosë 7-vjeçarin në vendlindje, në Kosovë.
