‘’E mori si e mori”/ Rama kujton garën me Bashën për Bashkinë e Tiranës

Kryeministri Edi Rama, ka ironizuar mënyrën e të bërit fushatë nga ana e krydemokratit Lulzim Basha.

Gjatë një bashkëbisedimi me stukturat e Partisë Socialiste në njësinë 1 në kryeqytet, Rama u shpreh se Basha po premton vetëm lekë, ndërsa ai punë.

Kreu i qeverisë tha ndër të tjera, se Basha gjatë 4 viteve si kryebashkiak nuk bëri asnjë punë në Tiranë, teksa kujtoi edhe garën midis tyre në vitin 2011.

Edi Rama: ”Kur Basha doli në atë garë premtonte nënë e babë dhe më kujtohen dy premtime spektakolare, tramvajin dhe do ulë çmimin e bukës, pa iu dridhur qerpiku. Thotë kam ardhur të të takoj sy më sy dhe do vij prap sy më sy, në fakt pasi e mori si e mori, kjo është temë tjetër, sytë e tij nuk panë më askënd se u mbyllën për gjumë. Ajo që pësoi Tirana ishin 4 vjet të humbura.

Sot thotë ‘lekë, lekë, lekë,’ të gjithë iu premton ‘lekë. lekë’, ndërsa unë them ‘punë, punë, punë’. Kush iu premton lekë, nuk iu jep, jo lekë, por ju jep mbrapsht 2 gishtat në bebet e syrit, ndërkohë që kush premton punë, jo duke e thënë do ju jap punë dhe për vete duke fjetur gjumë, por duke punuar pa pushim, atëherë kur ke një punë vijnë dhe lekët, ndërsa kur shkon pas lekëve, jo vetëm që s’ke punë, por as lekë nuk merr.’’