Deputetja Rudina Hajdari ka dalë në mbështetje të Vjosa Osmanit, e cila u shkarkua një ditë më parë nga LDK.
Përmes një postimi në Facebook, Hajdari përgëzon Osmanin për qëndrimet e saj, duke e cilësuar si një grua me parime të forta.
Deputetja thekson se ashtu si Osmani edhe ajo e ka kaluar në kurriz furinë e baltës dhe mërinë e politikës së burrave, të cilët sipas saj nuk e duan mendimin ndryshe dhe demokracinë.
Kujtojmë se Këshilli i Përgjithshëm i LDK-së vendosi që ta shkarkojë mbrëmjen e së shtunës Osmanin, nga të gjitha pozitat e saj në këtë parti.
Postimi i plotë:
Ju përgëzoj Vjosa R. Osmani për qëndrimet tuaja dinjitoze si një grua me parime të forta. Ju admiroj për kurajon tuaj. Unë, ashtu si ju sot, e kam kaluar në kurriz furinë e baltës dhe mërisë së politikës së burrave të cilët e urrejnë mendimin ndryshe dhe demokracinë.
Por ajo që kam mësuar dhe jam e sigurtë ju e dini shumë mirë është se me rëndësi në politikë është vetëm besnikëria ndaj parimeve dhe elektoratit. Qëndro e fortë dhe ju uroj shumë suksese
