Kryesore

Durrësi dhe Vora, precedentë që mund të sjellin ripërsëritjen e zgjedhjeve lokale


               Publikuar në : 15:01 - 18/07/19 S.N

Socialistët po përgatiten të marrin në dorëzim të gjithë pushtetin vendor. Nga ana tjetër,  PD dhe aleatët, të nxitur nga presidenti Ilir Meta po përgatiten për zgjedhje të reja në 13 tetor. Dje gjykata vendosi të mos njohë zgjedhjet në Durrës dhe Vorë.

Arsyetimi: Bindja Demokratike është regjistruar në garë jashtë afatit ligjor. Fjalën e fundit mbi ligjshmërinë e zgjedhjeve lokale e ka Gjykata Kushtetuese, që do ngrihet në shtator. Gjithsesi, vendimi i djeshëm i hap rrugë bisedimeve jozyrtare mes palëve për zgjidhjen e krizës.

Pasi dështoi të pengojë 30 qershorin, opozita duket se po lëshon nga disa prej kërkesave të saj. Tashmë synohet minimalisht ripërsëritja e zgjedhjeve lokale, qoftë edhe me Edi Ramën kryeministër. Më pas arritja e një marrëveshje të gjerë politike mbi reformën zgjedhore, dhe garanci shtesë për ndershmërinë e zgjedhjeve në vitin 2021. Në këtë skenar, do të fitonin të gjithë.

Qeveria nuk do akuzohej më për monizëm, dhe opozita do të ri përfaqësohej në organet vendore, duke rikthyer një farë balance të pushtetit. Në pamje të parë do përfitonte edhe Shqipëria, me hapjen e bisedimeve të anëtarësimit me BE. Por vetëm kaq. Reforma në drejtësi, ka rritur shpresat për nxjerrjen në pension të kësaj klase politike. Paktet e reja mes aktorëve të kësaj klase politike, vetëm sa do ta riciklojnë atë. Kësisoj, Shqipëria do të vonojë ndarjen e saj me tranzicion e gjatë 30-vjeçar./ TIRANA TODAY

Kthehu
WhatsApp Denonco ne TT