Shqipëria gjatë ditëve të fundit po përballet me një fluks të infektuarish. Shifrat janë në trend rritës, e kjo ka sjellë edhe frikën e qytetarëve për një izolim të dytë. Një masë e tillë po shihet si e largët nga ana e autoriteteve, nëse funksiojnë një sërë masash të tjera. Mbajtja e maskës ende shihet me skepticizëm për një pjesë të qytetarëve, të cilët nuk duan t’ia dinë edhe për gjobat.
Mjeku i njohur, Pëllumb Pipero, foli në studion e “Ilva Now”, ndërsa tha se me shqetësim duhet parë rritja e të shtruarve në spitale. “Normalisht unë mendoj se shifrat tek ne janë pothuajse në ato ritme që janë edhe në vendet e tjera të rajonit.
Në të gjithë rajonin, numri i rasteve te infektimet ka ardhur duke u rritur. Është një rritje e qëndrueshme, çfarë tregon për një qarkullim të shtuar të virusit në vendit tonë.
Rritja e numrit të testeve dhe tamponëve, ka arritur të evidentojë raste të shtuara me Covid-19. Në opinionin tim se sa shqetësuese është situata, duhet ta tregojnë numrat e të shtruarave në spital, se sa numrat pozitivë.
Numri i rasteve të shtruara është relative, çfarë na bën të mendojmë thellë për të marrë masa të arsyeshme për të mundësuar uljen e ritmit të shpërndarjes së pandemisë në vendin tonë”, tha ai.
Mjeku shtoi se një mbyllje e dytë nuk shihet si strategji e mirë, por theksoi se para marrjes së kësaj mase ekstreme, qytetarët dhe bizneset duhet të respektojnë protokollet shëndetësore, të diktuara nga Ministria e Shëndetësisë. Pipero tha se mbyllja nuk është zgjidhje. Mjeku paralajmëroi për kufizime. Duke përjashtuar shkollat, Pipero shtoi se duhet komunikuar me bizneset për kufizime të arsyeshme.
“Së bashku duhet të mos mendojmë për një izolim të dytë. Mbyllja nuk është zgjidhje, ishte një zgjedhje e detyruar për momentin, por rast pas rasti mund të bëhet në qytetet e vogla.
Askush nuk mund ta parashikojë, por nuk do të ishte një zgjidhje që e ndihmon qoftë frenimin, qoftë ekonominë dhe e kam të vështirë të them se cilat do ishin shifrat për të marrë këtë masë ekstreme.
Mund të kemi kufizime të arsyeshme. Ne jemi koshientë, që vatrat kryesore që transmetohet virusi janë familja, brenda të njëjtës familje, janë të rinjtë, janë restorantet, lokalet, baret.
Respektimi i protokolleve strikte, kufizimi i orareve në lokalet e natës. Nëpër lokale nuk respektohet distanca nëpër lokale. Janë një sërë protokollesh që duhet respektuar normalisht. Duke përjashtuar shkollat, unë mendoj se jo tani, por duke parë në vijimësi duhet komunikuar me bizneset për kufizime të arsyeshme, dhe të nevojshme”, tha ai.
