Drejtori i Urgjencës Kombëtare, Skënder Brataj, qetësoi shqiptarët se ndonëse numrat e të infektuarve janë në rritje, nuk po mendohet për një karantinim të dytë.
Ai tha në studion e ‘Opinion’ se vendi do të shkojë sërish në karantinë, nëse numri i pacientëve që kërkojnë hospitalizim i kalon kapacitetet e spitalit, pra shkon më shumë se 400 të shtruar. Numri total i shtretërve është 400. Aktualisht janë 55 persona të shtruar, por Brataj e sheh izolimin si një opsion tejet të largët. Por njëkohësisht kërkoi ruajtjen e vigjilencës nga ana e qytetarëve, pasi sipas tij, kjo rritje vjen për shkak të shmangies së masave.
“Për momentin as që e mendojmë të mbyllemi prapë në karantinë. Në mund të mbyllemi vetëm nëse numri i kapaciteteve në spitale arrin aq shumë, saqë i saturon të gjitha resurset tona, si në burime njerëzore pra në mjekë e infermierë, si në shtretër, do ndodhë si në të gjithë botën.
Ne momentalisht kemi 400 shtretër, 55 janë të zënë, nëse numri i pacientëve që kërkojnë hospitalizim i kalon 400 të shtruar në spitale, atëherë s’kemi çfarë të bëjmë dhe do duhet të mbyllemi. Por që nuk mendoj se do shkojmë deri aty. Tani kemi dhe një gjë pozitive, pasi koha e shërimit është më e shkurtër se më parë”, tha Brataj.
