Gazetari investigativ Artan Hoxha një natë më parë në emisionin “Opinion” ka zbuluar një pjesë nga një dosje që sipas tij është asgjësuar me vendim gjykate. Bëhet fjalë për një dosje hetimore ndaj biznesmenit Kastriot Ismailaj, ish-administratori i DIA, që ndodhet në burg, i dënuar në lidhje me skandalin CEZ-DIA.
Teksa Kastriot Ismailaj ishte në përgjim për këtë skandal prej vitit 2008, prokurorisë i ka rënë në dorë edhe një SMS-je e marre nga Ismailaj, (i akuzuar për pastrim të rreth 7 milionë eurove), nga një numër telefoni (0682031701) qe dyshohet të ishte në përdorim te Ilir Metës. Gazetari Artan Hoxha tha se presidenti Ilir Meta është i përfshirë në atë që ai e quan dosja “978”.
Më datë 22 qershor të vitit 2009, dy ditë para zgjedhjeve, sipas Hoxhës, ky biznesmen ishte kontaktuar nga Ilir Meta, i cili i kishte kërkuar 200 mijë euro.
SMS është dërguar më 22 qershor 2009 ora 17:27:
“Nesër në darkë (më 23 qershor), duhet të takohemi patjetër. Më duhen 200 mijë patjetër. Mos harro”.
“Dosja 978″ kishte mbi 8 mijë faqe me përgjime që nisnin që në vitin 2008, ku ishin të përfshirë gazetarë, botues mediash, politikanë dhe biznesmenë. Ka pasur madje plane sesi do të vinin lekë nga Afrika dhe do të pastroheshin në Shqipëri. Biznesmeni i përgjuar është kontaktuar nga Ilir Meta dy ditë përpara zgjedhjeve të vitit 2009, dhe i ka kërkuar plot 200 mijë euro”, tha Artan Hoxha.
Ai tha se përgjimet janë asgjësuar në datë 27.10.2010, me vendim të gjykatës.
“Materialet dhe përgjimet e zbardhura duheshin asgjësuar, por nuk jam i sigurt çfarë ka ndodhur. Në vitin 2016, unë nxora pjesë të dosjes që ende nuk është fshirë”, u shpreh më tej Artan Hoxha.
