Update/ Kryetari i Partisë Demokratike, Lulzim Basha, në Kuvendin Kombëtar të Partisë Demokratike, pranoi se kishte bërë gabime që sipas tij “ishin të kushtëzuara nga koha dhe rrethanat”, ndërsa kritikëve u tha se dora e tij mbetet e shtrirë për të gjithë ata që duan të kontribuojnë për të kthyer këtij vendi shpresën dhe besimin tek e nesërmja.
“Unë kam bërë gabimet e mia, për të cilat kam pranuar përgjegjësinë time. Nuk dua ta zbeh këtë përgjegjësi, por çdo gjë që kam bërë e kam bërë me qëllimin për t’i shërbyer njerëzve, i bindur për problemet dhe rreziqet që u kanoseshin atyre dhe vendit. Jam i vetëdijshëm për gabimet e mija, të diktuara nga rrethanat, koha dhe gjendja në të cilën ndodheshim. Kam diskutuar për to me mijëra demokratë gjatë muajve të fundit—kam dëgjuar mendimet e tyre, kam pranuar kritikat e tyre, kam gjetur mirëkuptimin dhe kam marrë mbështetjen e tyre.”
Në një referencë për të gjithë kritikët brenda Partisë, Basha tha se dora e tij mbetet e shtrirë për të gjithë ata që duan të kontribuojnë.
“Por gjatë muajve të fundit ka patur edhe akuza e sulme personale. Kam zgjedhur të mos u përgjigjem këtyre sulmeve, sepse si kryetar partie më takon mua të parit të të jem më i duruar dhe më i matur, dhe të mos i përgjjigjem inatit dhe luftës personale me inat dhe luftë nga karrikja e kryetarit.
Dora ime do të mbetet e shtrirë jo për pazare as për të bërë fotografi por që së bashku të ndërtojmë rrugën tonë drejt suksesit. Qeverisja e Edi Ramës është kriminale. Eshtë qeveri hajdute. Mashtruese. Eshtë qeveri e një grushti njerëzish. Eshtë anti-popullore. Eshtë një kastë që shërben vetëm interesat e saj. Në Shqipëri Edi Rama ka instaluar një qeveri private ku vendos vetëm ai. Kuksianët janë në burg. Dritan Zagani është në mërgim.
Saimir Tahiri është në parlament. Tahiri është i lirë, edhe pse është ministri i brendshëm më i implikuar në krim në gjithë historinë e Europës. Nuk është kuvendi, nuk është qeveria, nuk janë institucionet shtetërore që bëjnë politika dhe vendosin politikat e vendit. Është Edi Rama me një grusht klientësh, dhe në ortakëri me krimin. Çdo minutë oligarkët e Ramës marrin mijëra euro nga paratë tona përmes konçesioneve, kontratave dhe favoreve direkte nga buxheti i shtetit.
Pengmarrësit e kësaj qeverisje janë Gjiknuri, Veliaj, Dako i bandave të Durrësit, Qazim Sejdini me bandat e tij të heroines. Pengmarrësit e socialistëve janë Balilajt dhe Habilajt, janë oligarkët dhe klientët e Edi Ramës. Simboli më i turpshëm i kësaj qeverisje, është ai që i lidh të gjithë këta bashkë.”
Nis punimet Kuvendi i PD-së, 7500 anëtarë do miratojnë statutin e ri
Partia Demokratike ka mbledhur sot Kuvendin Kombëtar për të miratuar statutin e ri të kësaj force politike. Më shumë se 7500 anëtarë janë mbledhur në Pallatin e Kongreseve ku pas fjalimeve të rastit do të votohet statuti i ri.
Të pranishëm janë gjithashtu edhe aleatët e PD-së në opozitë, Monika Kryemadhi, Petrit Vasili, Fatmir Mediu, Nard Ndoka etj.
Ngrihet komisioni i administrimit të votimit
Në nisje të punimeve të Kuvendit, nënkryetari i PD-së, Edi Paloka njoftoi se komisioni i votimit në Kuvendin Kombëtar do të drejtohet nga Jemin Gjana dhe anëtarë do të jenë edhe Albana Vokshi dhe Belind Këllici.
AXHENDA
- Nënkryetari i PD-së, Edi Paloka hap Kuvendin Kombëtar të Partisë Demokratike.
- Fato Murraj anëtarja më e moshuar në Kuvendin Kombëtar të Partisë Demokratike.
- Lulzim Popa, një prej protestuesve në Kukës, i cili u arrestua nga policia e shtetit pasi kërkonte heqjen e tarifës për “’Rugën e Kombit”, bashkë me deputetin Flamur Noka në Kuvendin Kombëtar të Partisë Demokratike.
- Mënyre Lila, familjare nga Kavaja, i është hequr ndihma ekonomike. Jeton pa të ardhura, me bashkëshortin, vajzën e divorcuar dhe mbesën me aftësi të kufizuara. Së bashku me deputeten Grida Duma, në Kuvendin Kombëtar të Partisë Demokratike.
- Uran Kostreci, ish-i përndjekur, së bashku me deputetin Enkelejd Alibeaj, në Kuvendin Kombëtar të Partisë Demokratike.
- Xhovana Bala, anëtarja më e re e Kuvendit Kombëtar, së bashku me kryetarin e Forumit Rinor të Partisë Demokratike, Belind Këlliçi.
Ne fund flet kryetari i PD Basha
Pas fjalimeve Arben Ristani sekretar i pergjithshem prezanto stautin e ri dhe pastaj nisin dikutimet mbi te
Partia Demokratike mbledh sot Kuvendin Kombëtar, ku mbi 7 mijë delegatë të forcës kryesore të opozitës do të votojnë dhe miratojnë statutin e ri të kësaj force politike. Kuvendi Kombëtar mblidhet pasi pak ditë më parë Këshilli Kombëtar i PD-së miratoi ndryshimet statusore, që pritet të sjellin një tjetër organizim në këtë parti.
Ajo që bie në sy është fakti se pjesë e Kuvendit Kombëtar janë edhe disa nga kritikët e kreut demokrat, Lulzim Basha.
Si delegatë apo të ftuar, pjesëmarrës në Kuvendin Kombëtar janë Besnik Mustafaj, ish-deputet dhe ish-ministër i Jashtëm, Tomor Alizoti, ish-Kreu i Departamentit të të Përndjekurve Politikë në PD, apo Eduart Selami ish-kryetar i PD-së dhe kandidat për këtë post në zgjedhjet e fundit të brendshme në këtë parti.
Madje sikundër mësohet Eduart Selami ka kërkuar të mbajë edhe një fjalim para delegatëve në Kuvendin Kombëtar.
Nuk dihet nëse ish-kryeparlamentarja Jozefina Topalli apo ish-deputeti Astrit Patozi, do të jenë pjesë e punimeve të Kuvendit Kombëtar.
