Presidenti i SHBA-së Donald Trump dhe bashkëshortja Melania kanë rezultuar pozitivë me Covid-19.
Lajmin e ka përcjellë vetë presidenti Trump, ku me anë të një postimi në twitter ka shkruar se pasi i janë nënshtruar testit me tampon, ai dhe Melania kanë dalë pozitivë dhe janë izoluar.
“Sonte, Melania dhe unë dolëm pozitivë për COVID-19. Ne do të fillojmë procesin e karantinës dhe rikuperimit menjëherë. Do ta kalojmë këtë bashkë”, shkruan Trump.
Fillimisht ka qenë këshilltarja e lartë e Trump, ajo që ka shfaqur fillimisht shenja dhe pasi ka bërë tamponin është konfirmuar me koronavirus.
Në një deklaratë për mediat, zëdhënësi i Shtëpisë së Bardhë Judd Deere, tha se presidenti ka nisur edhe mjekimin.
“Presidenti e merr shumë seriozisht shëndetin dhe sigurinë e tij, dhe të gjithë atyre që punojnë në mbështetje të tij dhe popullit amerikan. Zyra e Operacioneve e Shtëpisë së Bardhë, bashkëpunon me mjekun e presidentit dhe Zyrën Ushtarake të Shtëpisë së Bardhë për t’u siguruar që të gjitha planet dhe procedurat ndjekin udhëzimet e Qendrës për Kontrollin e Sëmundjeve dhe praktikat më të mira për kufizimin e ekspozimit ndaj COVID-19 në masën më të madhe të mundshme si në Shtëpinë e Bardhë, ashtu edhe kur presidenti udhëton”, tha Deere.
Donald Trump është në një kohë fushate, pasi zgjedhjet presidenciale në SHBA pritet të zhvillohen më 2 nëntor.
