Ekonomi

Domatja “ambasadorja” e Shqipërisë, shtetet që duan të importojnë perimet tona

               Publikuar në : 14:57 - 02/08/19 S.N

Prodhimet bujqësore “Made in Albania” po rrisin prezencën në tregjet e huaja. Mjaft e kërkuar jo vetëm në tregjet rajonale, por edhe ato evropiane, tregtarët e prodhimeve bujqësore kanë krijuar rrugë të qëndrueshme për eksportin e domateve.

Kështu Shqipëria është në listën e 20 vendeve që kryesojnë si eksportues të domateve në botë. Njoftimin e ka bërë të ditur Banka Botërore, ku ndër të tjera thuhet se historia e eksportit të domateve shqiptare ka shënuar arritje. Ndërsa ende ka potenciale për rritjen e prodhimit.

Sipas Bankës Botërore, mesatarja e çmimit për njësi të domates shqiptare të eksportit është 5 herë më pak se çmimi për njësi i domates që eksporton Italia. (50 cent krahasuar me 2.40 US$)

Kjo do të thotë, argumenton Banka Botërore se, vendi ka mundësi të pashfrytëzuara në rritjen e cilësisë së eksporteve, duke nënvizuar rëndësinë e certifikimit me standardet ndërkombëtare.

“Qoftë edhe një rritje e lehtë në cilësi/çmim do të kish një ndikim të madh në vlerë përgjatë gjithë zinxhirit”, thekson BB.

Domatet shqiptare janë shumë të kërkuara në eksport. Ndërsa interes në rritje për perimet e freskëta “Made in Albania” po tregojnë tregjet si Bullgaria, Serbia, Bosnja, Kroacia, Gjermania, Italia, Holanda, Franca, Hungaria, Ukraina e deri në Rusi. Duke i ofruar sektorit të bujqësisë një domethënie të madhe, për rolin që ka në ekonominë e vendit.

Shqipëria eksporton në vit mbi 50 mijë ton perime, nga të cilat mbi 35 mijë ton domate. Edhe vlera më e madhe i takon eksportit të domateve me rreth 1.49 miliardë lekë të ardhura në vit.

Kthehu
WhatsApp Denonco ne TT