Policia bën me dije se 78 persona janë ndëshkuar me masë administrative sot, pasi kanë shkelur masat kufizuese të shpallura nga qeveria shqiptare.
Këta persona janë gjobitur me nga 10 mijë lekë secili, ndërsa një 24-vjeçar nga Elbasani është arrestuar pasi ka kundërshtuar efektivët e policisë.
Ndërkohë 4 drejtues automjetesh janë penalizuar me tërheqjen e lejes së drejtimit për 3 vjet. Ndërsa raportohet se janë ndëshkuar edhe 2 administratorë subjektesh tregtare, të cilët kanë hapur biznesin gjatë ditës së sotme.
NJOFTIMI I POLICISË SË SHTETIT
Vijojnë kontrollet nga strukturat e Policisë së Shtetit në të gjithë territorin, për zbatimin e masave kufizuese të shpallura nga qeveria shqiptare, për vënien në kontroll të pasojave që sjellin përhapjen e COVID-19.
Në këtë kuadër, në të gjithë vendin, gjatë 12 orëve të fundit janë ndëshkuar me masë administrative 10.000 lekë secili, 78 persona që thyen rregullin për të qëndruar në banesë deri në orën 05:00 të datës 23.03.2020.
Në Elbasan, një 24-vjeçar u arrestua në flagrancë, pasi kundërshtoi me dhunë punonjësit e Policisë, të cilët i kërkuan arsyen e daljes në rrugë.
Nga Policia Rrugore janë evidentuar dhe ndëshkuar me tërheqje të lejes së drejtimit për 3 vjet, 4 drejtues automjetesh.
Janë evidentuar dhe ndëshkuar edhe 2 administratorë subjektesh tregtare, pasi në kundërshtim me orarin kufizues, kanë hapur subjektet e tyre ditën e sotme.
Policia e Shtetit apelon edhe njëherë për të gjithë qytetarët që të respektojnë me rigorozitet masat e vendosura, me qëllim parandalimin e përhapjes së COVID-19.
