Kryeministri britanik, Boris Johnson deklaroi dy ditë më parë se vetëm pacientët që janë në gjendje më të rëndë shëndetësore nga koronavirusi do të testohen.
Ndërsa për të tjerët që kanë simptoma të lehta, Johnson shtoi se ata do të urdhërohen të izolohen për 14 ditë.
Në lidhje me këto deklarata ka reaguar edhe Organizata Botërore e Shëndetësisë, e cila i ka kritikuar ashpër masat e marra nga ai.
Drejtori i përgjithshëm i OBSH-së, Tedros Adhanom Ghebreyesus reagoi një ditë më vonë duke thënë se çdo vend duhet të gjejë dhe testojë çdo rast të mundshëm të infektuari.
“Ju nuk mund të luftoni një virus nëse nuk e dini se ku është. Gjejeni, izolojeni, testojeni dhe trajtoni çdo rast për të këputur zinxhirin e transmetimit të Covid-19. Çdo rast që ne gjejmë dhe trajtojmë kufizon përhapjen e sëmundjes. Mos lejoni që ky zjarr vetëm të digjet. Çdo vend që shikon përvojën e vendeve të tjera me epidemi të mëdha dhe mendon se “kjo nuk do të ndodhë me ne”, është duke bërë një gabim vdekjeprurës”, tha drejtori i përgjithshëm i OBSH-së, raporton Daily Mail.
