Nga Anxhela Ferra
Teksa vetëm 10 ditë na ndajnë nga data 30 qershor, qytetarët ende nuk e dinë se çfarë do të ndodhë. Në ditët e parë të muajit qershor, Presidenti Meta vendosi të shtyjë datën e zgjedhjeve. Por, kjo gjë nuk u pranua nga qeveria, e cila ‘betohet’ se zgjedhjet lokale do të kryhen të dielën e fundit të muajit. Nga ana tjetër opozita ka nisur me përshkallëzimin e aksioneve penguese. Në shumë KZAZ është penguar procesi i i grumbullimit të materialeve zgjedhore. Duke mos munguar dhe tensionet apo incidente.
Por, teksa politika ka agjendën e vetë; ata të cilët edhe përcaktojnë me votën e tyre janë të ndarë se çfarë do të bëjnë. Edhe pse duket që pjesa më e madhe e tyre kanë vendosur t’i bojkotojnë ose janë ende në mëdyshje.
“Nuk më bëhet vonë për ta. As nuk do të shkojmë fare të votojmë, ta harrojnë. Le të ikin të gjithë, nuk na bëhet vonë për zgjedhjet. Hajdutë do të vijnë gjithmonë.”
“As do votoj e as do protestoj. Në 30 qershor do rrimë, do ikim fare në plazh.”
“Unë jam në ujëra neutralë, nuk dua t’ia jap asnjërit votën. Prandaj më mirë do të fle gjumë.”
“Të shikoj ende nuk e kam vendosur se çfarë do të bëj. Kam edhe një javë kohë të mendohem. Unë dua të bëhet luftë.”
Një pjesë e qytetarëve janë të prerë në vendimin për 30 Qershorin, duke thënë se do të pengojnë me çdo kusht zhvillimin e procesit zgjedhor.
“Asnjëherë në botë, ça thua ti. Do rri në shtëpi, do pi raki. Patjetër që do të protestoj, sikur edhe duke pirë. Por, për të votuar jo, harroje votën.”
“Do të protestojmë fuqishëm në çdo vend ku të mundemi. Në çdo vend të Tiranës, me rrëmuja nga më të fuqishmet.”
“Do protestojmë sepse nuk kemi asgjë në terezi.”
Ndërkohë, në mes të të pavendosurve dhe atyre që do të protestojnë; janë edhe votuesit besnik. Ata shprehen se janë të gatshëm të shkojnë në qendrat e votimit edhe nëse do të ketë tensione.
“Unë do votoj, pasi me votë ndëshkohet tjetri. Pasi edhe nëse ka tensione, unë përsëri do shkoj të votoj. Më pëlqen Erion Veliaj sepse ka bërë punë. Ndaj jam e gatshme të shkoj për Erionin, edhe nëse bëhen rrëmuja.”
“Pse të protestojmë, nuk ka arsye. Sigurisht që do të votojmë.”
“Ne jemi një vend i lirë dhe ata që protestojnë janë një grup njerëzish kot. Edhe ato përgjimet që po dalin janë të inskenuara. Nuk besoj asnjërën, ato janë përrallë nga e kaluara.”/ TIRANA TODAY
