Sot përfundon afati i anëtarëve të SPAK, për të aplikuar për postin drejtues të këtij institucioni të drejtësisë së re. Nga 8 anëtarët e emëruar, mësohet se interes për kreun e SPAK do të paraqesin tre prokurorë si; Altin Dumani, Arben Kraja dhe Ervin Kondili, të tre që i kanë kaluar pa problem të dyja shkallët e Vettingut. Më pas Këshilli i Lartë i Prokurorisë do të miratojë metodologjinë për përcaktimin e kandidatit fitues, të cilët ashtu siç ndodhi edhe me Prokurorin e Përgjithshëm, do ti nënshtrohen një seance publike dëgjimore ku do të paraqesin platformën e tyre.
Pas marrjes së detyrës, kreu i SPAK do të zgjedhë drejtuesin e byrosë kombëtarë të hetimit, strukturë kjo që do të funksionojë njëkohësisht me SPAK. Struktura e Posaçme Antikorrupsion do të nisë detyrën pas zgjedhjes së kryetarit, duke marrë në dorëzim rreth 300 dosje nga Krimet e Rënda.
Prokurori i Krimeve të Rënda, Anton Martini, kandidat për Prokurorinë e Posaçme kundër Korrupsionit dhe Krimit të Organizuar, SPAK, do të përballet sot me Komisionin e Pavarur të Kualifikimit.
Procesi i Vettingut për Martinin po kryhet nga trupa gjyqësore e përbërë nga Genta Tafa Bungo, Pamela Qirko dhe Etleda Çiftja.
