Djali i vogël i liderit të Lëvizjes Studentore të Dhjetorit, Azem Hajdari, në aktivitetin që u mbajt në “Qytet Studenti” pranë shtatores së të atit në kuadër të 8 Dhjetorit, deklaroi se përballë krizës ku ndodhet vendi, kjo ditë të jetë frymëzim për ta bërë Shqipërinë më të denjë. Djali i vogël i familjes Hajdari, e ka konsideruar të gjithë këtë ndodhi si një përrallë të dëgjuar disa herë, dhe se shpreson se një ditë babai i tij të jetë frymëzim.
“Ju falenderoj që keni ardhur këtu dhe falenderoj Zotin që ekziston një shpirt i një njeriu të tillë, që të luftojë për të drejtën dhe të mirën e njeriut. Kjo ditë në memorien time ka qenë si një ditë përrallore për nga madhështia e guximit dhe e mirësisë madhështore të atyre njerëzve që luftuan për liri, demokraci dhe të mirën e kombit tonë.
Kjo përrallë që unë e kam dëgjuar aq shumë herë dhe çdo herë është bërë më bukur, kuptoj se ishte reale dhe këta njerëz që luftuan ishin mes nesh. Luftuan komunizmin me mirësinë dhe idealet e tyre.
Dua t’ju them që shpresoj që kjo ditë, babai im të jetë një frymëzim për të gjithë ne, për ta kthyer Shqipërinë më të denjë dhe nuk e mendoja që do të vinte kjo ditë që do të mblidheshin njerëzit sërish kështu.
Mendoja se ishte diçka e së shkuarës. Por kur shikon që kombi jot, shteti jot është në krizë absolutisht që kjo ditë do të vinte dhe këta njerëz do të ngriheshin përsëri. E shfrytëzoj këtë rast për të thënë; shpresoj që kjo ditë të jetë frymëzim për të gjithë dhe të shmangin të gjithë njerëzit që janë në dëmin e këtij vendi. Ju falenderoj të gjithëve”, tha ai.
