Kryedemokrati Basha, ka ndarë një tjetër mesazh për Kuvendin e PD-së që do të mbahet në 18 dhjetor. Në një postim në rrjetet sociale, Basha ka publikuar një foto nga instilacioni me firmat e themeltarëve të PD-së, i cili u vendos përpara selisë blu në ditëlindjen e partisë më 11 dhjetor. Basha pohon se demokratët do të bashkohen më 18 dhjetor për të zgjedhur të ardhmen, për t’i dhënë fund tranzicionit.
Ja se çfarë shkruan Basha
Ora më e errët është ajo pak përpara agimit. Kështu ishte 31 vite më parë, kur Partia Demokratike e Shqipërisë u themelua për të ndarë të ardhmen nga e shkuara, për të sjellë lirinë, për të rrëzuar kultin e individit dhe për ta ribashkuar Shqipërinë me Perëndimin. Kështu është sot. Prandaj ditët më të mira i kemi përpara. Demokratët do të bashkohen më #18Dhjetor për të zgjedhur sërisht të ardhmen, e me qytetari do ofrojnë modelin e ndryshimit që shqiptarët kërkojnë, për t’i dhënë fund tranzicionit.
Dje Basha shpërtheu në akuza të forta në adresë të ish-kryeministrit Sali Berisha. Ky i fundit dhe ithtarët e tij mësynë në selinë e PD-së, ndërkohë që kryedemokrati Basha ishte duke zhvilluar një mbledhje grupi me deputetët demokratë. Por kjo lëvizje e Berishës ka ngjallur reagimin e ashpër të kryedemokratit Basha, i cili nga ambientet e selisë blu foli gjatë për gazetarët.
Lideri demokrat akuzoi paraardhësin e tij se tentoi të provokojë një ’97 të dytë brenda Partisë Demokratike. Sipas tij, Berisha bëri shumë që të harrohej ’97, por po rishfaqet sërish si një fantazmë e së kaluarës.
“Sali Berisha është sot problemi i PD-së, ai është pakica e dëshpëruar dhe si pakicë e dëshpëruar as sot nuk do ketë mundësi të marrë peng shumicën e demokratëve të cilët janë të vendosur që të shkojnë para dhe të lënë pas të shkuarën.
Trekëndëshi i Bermudës e ka mbajt peng 31 vjet Shqipërinë. Ndaj nervoziteti i Sali Berishës po vjen duke u shtruar. Koha na mbaron të gjithëve ne, dhe dikush i madh në moshë, vjen e koritet. Në veri ka një shprehje ‘Burri ka kohë me u korit’.
Më vjen keq, është koritur e shfaqet si një fantazmë e së kaluarës. Kjo është një situatë jashtëzakonisht e vështirë. Përballë njerëzve me precedentë kriminalë që solli Sali Berisha, duke na kujtuar ’97, me zellin e pangordhur të një ish-komunisti”, deklaroi ai.
