Kryetari i PD-së Lulzim Basha ka reaguar në kuadër të Ditës Botërore të Shëndetit, teksa falenderoi SHBA për ndihmën financiare.
“Sot dua të shpreh falenderimin tim për ndihmën financiare të aleatëve tanë strategjikë SHBA, e cila do t’i mundësojë sistemit shëndetësor 30 mijë kite testimi aq shumë të domosdoshëm në këtë betejë”, shkruan Basha në rrjetin social Facebook.
Kreu i opozitës shprehet se mirënjohja ditën e sotme i shkon gjithë personelit shëndetësor që po përballet prej një muaji me pandeminë e COVID-19.
Reagimi i plotë i Bashës: “Sot në #WorldHealthDay mirënjohja e zemrave tona i shkon gjithë personelit shëndetësor që po përballet prej një muaji me pandeminë e COVID 19. Ata janë garancia dhe forca jonë, bashkë me të cilët do ta fitojmë këtë betejë.
Ata sot kanë nevojë për mbrojtje, paisje, mbështetje. Sot dua të shpreh falenderimin tim për ndihmën financiare të aleatëve tanë strategjikë SHBA, e cila do t’i mundësojë sistemit shëndetësor 30 mijë kite testimi aq shumë të domosdoshëm në këtë betejë.
Testimi dhe izolimi janë e vetmja mënyrë për të ndërprerë zinxhirin e infeksionit dhe për të mposhtur virusin. #ditemetemira”.
