Një ditë para protestës shumë të përfolur të opozitës, policia paralajmëroi se në protestë do të ketë edhe persona që sipas tyre janë me precedentë penalë. Ku sipas policisë do të krijojnë tension dhe mund ta çojnë protestën drejt dhunës. Pas kësaj, PD doli në një njoftim duke siguruar se nuk do të ketë eksponentë të dhunshëm.
Ndërkohë qytetarët duken se kanë mendime të ndryshme, sa i takon protestës së të shtunës. Për disa dhuna do të jetë e pranishme dhe do të shkaktohet nga eksponentë të partive politike. Ndërsa të tjerë janë më optimist, duke u shprehur për Tirana Today se do të jetë protestë paqësore.
“Protesta do të jetë paqësore sepse populli nuk krijon rrëmujë. Vetëm nëse provokohen, sepse vetëm këto të fundit sjellin rrëmujat. Lëre se çfarë thotë policia, ti shiko kë ke ministër të Brendshëm. Unë sigurisht që do të dal, për ekonominë, punësimin, por mbi të gjithë të keqqeverisjes. Me protesta të vazhdueshme do të arrihet qëllimi dhe do largojmë Ramën.”
“Unë mendoj se nesër do të ketë rrëmujë. Sipas meje do ta shkaktojnë të dyja partitë, do të futen spica me njëri-tjetrin. Patjetër që dhe unë do të dal nesër në protestë, por unë nuk do të shkaktoj rrëmujë. Do të dal të protestojë për të drejtat tona, për punë, ekonominë të gjitha.”
“Protesta nesër do të ketë gjak dhe sa më shumë gjak të ketë, aq më tepër para ka në rrugë. Unë nuk do të shkoj në protestë, por po të ishte për mua në qendër do të vija disa drunj dhe do t’i digjja të gjallë të gjithë. Këto janë vampirë. Protesta nesër është kot. Njerëzit duhet të shkojnë aty te rruga e Elbasanit, se ata atje tërheqin fijet. Kur të kuptojmë se kush na komandon, atëherë do të lirojmë pak shpirtin.”
Teksa opozita vazhdon edhe ditën e sotme me takimet me njerëzit, duke i bërë thirrje për t’iu bashkuar protestës; disa nga qytetarët e pyetur nga Tirana Today shprehen se nuk do të dalin në shesh. Kjo sepse nuk presin rezultate dhe e vetmja gjë që do të kërkohet sipas tyre, është të vihet Basha në qeverisje.
“Nuk e di nëse do të ketë apo jo dhunë, por uroj të mos krijohen situata të tilla. Secili të kërkojë të drejtat e veta, të thonë atë që mendojnë e duan. Unë nuk do të dal në protestë, më pëlqen nuk më pëlqen, nuk dal.”
“Protestë e zakonshme është, asgjë tjetër. Nuk kam pse të dal, ndaj nuk shkoj në protestë. Për kë të dal, për Lulin?! Nuk kam halle fare unë, se po dole nesër do kërkohet veç që të vihet Luli kryeministër e asgjë tjetër.”
Ndërsa, një tjetër qytetarë thotë se tani ka ardhur koha që Basha të jetë kryeministri i ri. Kjo pasi në Shqipëri funksionon veç sistemi i radhës.
“Pse të mos e vëmë Lulin, ai e ka radhën. Nuk e keni mësuar akoma ju që këtu te ne me radhë funksionon. Kur duan bëjnë rrëmujë e kur duan bëjnë paqe. Mirëpo, nesër do të bëhet paqe dhe pikë.”/ TIRANA TODAY
