Detaje tronditëse vijnë nga Shkodra, ku vëllai vrau motrën që ishte kthyer për pushime nga Gjermania. Autori ishte i papunë dhe luante bixhoz, ndërsa e ndjera e ndihmonte. 58-vjeçarja Diana Vukaj, kishte ardhur nga Këlni i Gjermanisë me datë 4 qershor. Krimi makabër është zbuluar nga telefonata në sallën operative të policisë, e cila pas kontrollit e ka gjetur 58-vjeçaren të vrarë me silenciator në dhomën e saj të gjumit. Viktima kishte 25 vite që jetonte në Gjermani, dhe vazhdimisht e ndihmonte të vëllanë i cili kishte probleme me alkoolin dhe bixhozin.
Si u zbulua vrasja?
Pas kthimit nga Gjermania, Diana Vukaj është drejtuar për në Shkodër, për të qëndruar në banesën e saj. Burimet bëjnë me dije se ajo për pak ditë do të nisej për në shtëpinë e saj të pushimit në Velipojë. Për të sistemuar banesën e saj në Shkodër, ajo ka marrë një grua për të pastruar.
Ajo e ka telefonuar për disa herë gjatë të shtunës dhe të dielës, por 58-vjeçarja nuk është përgjigjur. Më pas zonja (indetiteti i së cilës nuk dihet) ka komunikuar me një mikeshë të viktimës dhe më pas në orën 22:30 të së dielës ka telefonuar sallën operative.
Diana Vukaj është gjetur e vrarë në banesë, ndërsa i vëllai është kapur në rrugën e lagjes. Nga këqyrja e vendit të ngjarjes është gjetur edhe arma e zjarrit tip pistoletë me silenciator, e cila dyshohet se është përdorur në kryerjen e krimit të rëndë.
