Detaje të reja janë mësuar lidhur ngjarjen e rëndë ndodhur në mesnatë në Tiranë, ku një polic ka qëlluar me armë zjarri për vdekje shtetasin Klodjan Rasha.
I ndjeri është qëlluar për vdekje nga efektivi i policisë në një “rrugicë qorre”, ku i riu ishte 100 metra larg shtëpisë së tij. Fqinjët thonë se 25-vjeçari nuk ngacmonte njeri. Ai ka qenë i papunë. Djali me origjinë nga Puka është më i vogli i familjes Rasha, që ka edhe dy djem më të mëdhenj.
“Rrinte në lagje, nuk shqetësonte njeri. Ishte djalë shumë i mirë. Ishte i papunë, por nuk ngacmonte njeri”, thonë fqinjët.
Polici që kreu vrasjen, po mbahet i shoqëruar në komisariat. SHÇBA po sheh nëse veprimet e policisë janë brenda protokollit të nevojshëm.
I riu ka pasur probleme me ligjin në vitin 2016, por që prej atëherë nuk i ka sjellë probleme askujt. Në zonën ku ndodhi krimi, janë sekuestruar të gjitha kamerat e sigurisë, për të parë nëse ka tejkalim të kompetencave nga ana e policisë.
