Ish-presidenti Bujar Nishani, ka paralajmëruar agresion të ashpër ndaj klasës politike, madje duke e demostruar me pamjet filmike të asaj se çfarë ka ndodhur me një deputet në Ukrainë. Nishani, i cili ka dalë hapur në mbështetje të Sali Berishës, ka rikujtuar sot në Facebook videon e momentit ku protestuesit në Ukrainë, disa vite më parë hodhën në koshin e mbeturinave një politikan, që e akuzonin si të korruptuar. Nishani thotë se këto skena do t’i shohim edhe qyteteve të Shqipërisë, dhe se shqiptarët do të hedhin në kosh “simbolet e tradhtisë”.
“Besoj se së shpejti këto skena do ti shohim dhe qyteteve të Shqipërisë. Shqiptarët do ti hedhin në koshin e plehrave simbolet e hajnisë dhe tradhëtisë”, shkruan Bujar Nishani.
Në vitin 2014, një grup protestuesish jashtë parlamentit të Ukrainës, kapën deputetin duke e hedhur në një kazan plehrash.
Vitaly Zhuravsky teksa po ecte mes turmës jashtë parlamentit, është tërhequr me forcë duke përfunduar brenda kazanit me plehra. Protestuesi që e hodhi e mban brenda duke mos e lejuar të dalë jashtë, ndërsa i shtyn kokën për të mos lëvizur.
Ai i hedh ujë mbi fytyrë, duke e goditur më pas me çantën e tij të punës. Deputeti fatkeq Vitaly Zhuravsky, ish-pjestar i Partisë së Rajonit të Presidentit Viktor Yanukovich, ishte autori i një projekt-ligji për ndalimin e rreptë të protestave anti-qeveritare. Më herët ai kishte nxjerrë një projekt-ligj tjetër, që dënonte me ligj shpifjet.
