Deputeti demokrat Halit Valteri ka sulmuar nga foltorja e Kuvendit Ilir Metën, ndërsa nuk i kurseu kritikat as për familjen e presidentit.
Teksa e konsideroi daljen e fundit të Metës në media një shfaqje të shëmtuar, Valteri tha ndër të tjera: “Ishte shumë i mërzitur dhe armatosur me mllef, sulmoi cilindo që i dilte përpara me mendjen e trazuar nga ëndrrat, se është keq të bësh burg në këtë moshë, është problem i madh. Presidenti harroi edhe rolin që kishte, përfaqësuesi i unitetit kombëtar dhe jo i LSI-së.
Ai shpalosi problemet që ka te partia në Bllok, nuk e di se cfarë vendi të botës, tek kjo që aspirojmë ne dhe jo ajo që aspiron Ilir, shqiptarëve u serviret gruaja e Presidentit si drejtuese partie dhe vajza e vogël, zonjë e parë e shtetit, që akoma nuk ka hequr bebelinën”, deklaroi ai.
Ndërkohë, kryetari i Kuvendit, Gramoz Ruçi ndërhyri duke i kërkuar që t’i tërhiqte pas ato që tha lidhur me familjen e Metës.
“Zoti Valteri është e padrejtë dhe kundër etikës ta ofendosh Presidentin dhe familjen e fëmijët e tij, prandaj kërkoj ti tërheqësh ato që the për atë”, u shpreh Ruçi.
