Deputeti Ralf Gjoni, ka nxjerrë blof dy palët politike, PS e PD, se mes tyre ka ende ‘marrëveshje’. I ftuar në “Ditari” në A2 CNN, ai tha qartësisht se mes dy forcave politike ekziston një “dashuri perverse”, që sipas tij, vihet re në seancat parlamentare ku mazhoranca “vazhdon e flirton me letra dashuriçkash me opozitën rrugore”.
“Nuk shkon që në një komision të Reformës Zgjedhore, të qëndrojë një person i përfolur për përfshirje në tjetërsimin e vullnetit të zgjedhësve shqiptarë. Kjo çështje i takon drejtësisë, por moralisht ka vend për dorëheqje, dhe unë dje prisja dorëheqjen. Do të ishte në nderin e asaj mazhorance që pretendon se na ka shtrirë dorën neve në Parlament, por ndërkohë vazhdon e flirton me letra dashuriçkash me opozitën rrugore”, tha deputeti.
Ndër të tjera Gjoni tha se Damian Gjiknuri duhet të largohej pas përgjimeve të publikuara nga “Bild”. Duke qëndruar në të njëjtën linjë, ai deklaroi se marrëveshja mes të vjetërve në kurriz të shqiptarëve, do i kushtojë edhe 10 vite të tjera Shqipërisë.
“Z. Gjiknuri tha dje se po presin që të vijë PD-ja sërish në Parlament, dhe atëherë është gati të largohet. Pra, vetëm nëse kthehet PD-ja. A e kuptoni se çfarë lloj dashurie perverse ekziston mes këtyre dy partive?
Marrëveshje mes të vjetërve në kurriz të shqiptarëve, që do i kushtojë edhe 10 vite të tjera Shqipërisë, siç i kushtoi marrëveshja e vitit 2008, nuk do të ketë. Nuk kanë më nevojë shqiptarët për dialog mes Edi Ramës, Ilir Metës, Sali Berishës, Lulzim Bashës dhe Monika Kryemadhit, por për një sistem demokratik ku të jenë të lirë të votojnë alternativa të reja”, shtoi Ralf Gjoni.
