Deputeti i Bundestagut Gjerman, Tobias Gottardt ka komentuar situatën politike, pas takimit të mbajtur në Kryesinë e Kuvendit me deputetët shqiptarë.
Ai tha se nuk mund të propozojë një zgjidhje për një situatë që palët e brendshme e dinë më mirë, por theksoi se ata që e duan demokracinë, janë pro dialogut për çdo situatë politike.
“Nuk besoj se më takon mua të përpiqem të zgjidh apo të jap komentet e mia mbi situatën e brendshme politike të cilën e njihni ju më mirë se kushdo tjetër. Ata që e duan demokracinë janë pro dialogut për përballimin e çdo situate politike. Jam këtu për të mbështetur çdo hap që Shqipëria po ndërmerr në anëtarësimin e bashkimit evropian”, tha Gottard.
Pas deputetit gjerman, foli edhe kryetarja e Komisionit të Jashtëm, Mimi Kodheli e cila tha se garantoi deputetin për vijimin e reformës në drejtësi, ndërsa shtoi se mazhoranca është e gatshme që t’ia zgjasë dorën opozitës për t’i thënë po dialogut por pa ndërprerë reformat:
“Mesazhet ishin të qarta, në garantuam kolegun gjerman për vazhdimin e reformës, sidomos asaj në drejtësi. Ne do t’i rrimë fort besimit tonë se jemi duke bërë gjënë e duhur, tashmë rezultatet kanë ardhur dhe pritet të vijnë. Kjo nuk e bën Shqipërinë më të dobët, por më të fortë. Mesazhi është i qartë, bashkë mund t’ia dalim. Jemi të gatshëm për t’ia zgjatur dorën opozitës dhe për t’i thënë po dialogut, pa ndërprerë reformat tona drejt integrimit.”/ Tirana Today
