Gjykata e Apelit la në fuqi dënimin nga Gjykata e Posaçme e Shkallës së Parë me 2 vite burg për Llallën. Ish-kryeprokurori mungoi në dhënien e vendimit, por avokati i tij e justifikoi me arsye shëndetësore, dhe e cilësoi të padrejtë vendimin. Ish-Prokurori i Përgjithshëm, Adriatik Llalla, do të bëhet zyrtari më i lartë shqiptar që do të shkojë në qeli.
Në një intervistë për televizionin francez TV5 Monde, kryeministri Edi Rama është pyetur për luftën ndaj korrupsionit, si një nga kushtet e Bashkimit Europian për anëtarësim. Duke u ndalur në dënimin me 2 vite burg të ish-kryeprokurorit Adriatik Llalla, Rama tha se pandëshkueshmëria në Shqipëri nuk është më një normë, dhe vendi po bën luftë të hapur kundër korrupsionit.
Brukseli e ka bërë luftën kundër korrupsionit, një kusht për anëtarësim. Në maj, një ish-drejtues i Prokurorisë u dënua me 2 vite burg. Po jua përsëris pyetjen, a është Shqipëria e pajtueshme me Europën në varësi të asaj ç’ka ju kërkon Brukseli?
“Fakti që pandëshkueshmëria në Shqipëri nuk është më një normë, dhe fakti që ka njerëz nga pushtete të forta që kanë dalë para gjykatave dhe janë dënuar, flet vetë. Po bëjmë një luftë të hapur kundër korrupsionit, po bëjmë një luftë të hapur për shtetin e së drejtës dhe dua të shtoj edhe luftën kundër trafikut të drogës. Së pari, nuk jemi një përjashtim në Europë. Së dyti, po të flasim për sasi, jemi ndër vendet me sasi më pak të konsiderueshme dhe së treti kemi bërë përparime shumë të rëndësishme në këtë drejtim”.
Llalla u shpall fajtor për veprën penale të fshehje të pasurisë, për të paktën tre episode. Hetimi ndaj tij u regjistrua fillimisht nga Prokuroria e Durrësit më 15 mars 2018, nën akuzat e ‘fshehjes së pasurisë’, ‘shpërdorimit të detyrës’ dhe ‘pastrimit të parave’.
