Gjatë ditëve të fundit, ish-kryeministri Berisha ka sulmuar ambasadoren amerikane Yuri Kim, duke e akuzuar se ajo po sillet si guvernatore në Shqipëri, dhe se po mbështet kryeministrin Edi Rama. SHBA i kanë çuar një mesazh të qartë ish-kryeministrit Sali Berisha, që të ndalë sulmet ndaj ambasadores Yuri Kim.
Lidhur me këto akuza, i pyetur nga “Zëri i Amerikës”, zëdhënësi i Departamentit të Shtetit Ned Price deklaroi se sulmet e Berishës ndaj ambasadores janë shumë të shëmtuara dhe nuk përfaqësojnë popullin shqiptar. Ai sqaron më tej se ambasadorja ka zbatuar qartë politikat e Shteteve të Bashkuara, siç e ka udhëzuar Uashingtoni.
Pak ditë më parë, Berisha sulmoi ambasadoren duke e cilësuar si një guvernatore që dikton kush hyn në Parlament ose jo. Berisha deklaroi se ata që sillen në këtë lloj mënyre, nuk do të kenë respekt teksa kritikoi Kim, pasi sipas tij, ambasadorja merret me një sistem drejtësie që është në gjendje katastrofe.
“Uashingtoni është i shqetësuar nga sulmet e pajustifikuara ndaj ambasadores tonë në Tiranë. Këto sulme të shëmtuara, nuk përfaqësojnë popullin shqiptar. Siç e ka udhëzuar Uashingtoni, thekson zëdhënësi Price, ambasadorja Kim ka shpjeguar dhe zbatuar qartë politikat e Shteteve të Bashkuara, përfshirë vendosmërinë e Presidentit Biden për të mbajtur përgjegjës ata persona që përfshihen në korrupsion, ose minojnë demokracinë.
Shtetet e Bashkuara, thekson më tej zëdhënësi, vlerësojnë marrëdhëniet me popullin shqiptar dhe vitin e ardhshëm do të kremtojmë 100 vjetorin e vendosjes së marrëdhënieve mes dy vendeve. Marrëdhëniet tona, përfundon zëdhënësi, i mbijetuan komunizmit dhe diktaturës për shkak të angazhimit të përbashkët për demokraci dhe respektit të ndërsjellë”.
