Ministri i Jashtëm i Serbisë, Ivica Daçiç deklaron se zgjidhja e kompromisit mes Kosovës dhe Serbisë, nuk nënkupton detyrimisht që kjo e fundit të pranojë pavarësinë e Kosovës në të gjithë territorin e saj.
“Për ne tani është e rëndësishme që të gjejmë një zgjidhje kompromisi. Kjo zgjidhje nuk mund të bëhet me detyrim, që Serbia ta njohë Kosovën si shtet të pavarur në tërë territorin e saj. Ky nuk mund të jetë kompromis”, tha Daçiç.
Në një konferencë të dhënë për mediat, Daçiç u shpreh se Serbia nuk do të paraqesë asnjë pengesë për vazhdimin e dialogut për normalizimin e marrëdhënieve me Kosovën.
Sipas mediave serbe, Daçiç u shpreh se nga Kosova kërkohet të hiqet taksa 100% që ajo u ka vënë prodhimeve të importuara nga Serbia pasi dialogu midis palëve është ndërprerë prej se Kosova e ka marrë vendimin për këtë taksë në nëntor të vitit të kaluar.
Nga ana tjetër, Qeveria e Kosovës, e udhëhequr nga kryeministri Ramush Haradinaj, ka thënë se taksa nuk do të hiqet derisa Serbia nuk e njeh Kosovën.
Presidenti i Serbisë, Aleksandar Vuçiç, ka thënë se dialogu me Kosovën nuk mund të vazhdojë pa u hequr kjo taksë. Idenë për ndryshimin e kufijve, si mundësi për normalizimin e marrëdhënieve, e kanë përmendur më herët edhe udhëheqësit e Kosovës, edhe ata të Serbisë.
Javën e kaluar, u anulua një takim midis përfaqësuesve të të dyja vendeve, i planifikuar të mbahet më 1 korrik në Paris. Takimi i paralajmëruar ka qenë nismë e presidentit të Francës, Emmanuel Macron, dhe kancelares gjermane, Angela Merkel.
Nuk dihet ende nëse ky takim do të mbahet në ndonjë datë të mëvonshme, ndërkohë që normalizimi i marrëdhënieve mbetet kusht si për Kosovën, ashtu edhe për Serbinë, që të bëjnë përpara në rrugën për integrimin në BE.
