Kryetari i Kuvendit të Serbisë, Ivica Daçiç deklaroi se dialogu me Kosovën nuk ka shënuar përparim, pasi sipas tij, pala kosovare nuk kërkon kompromis, por vetëm shtet të pavarur.
Daçiç u shpreh se Rusia dhe Kina duhet të përfshihen në dialog, në mënyrë që të arrihet një marrëveshje paqësore.
”Pala tjetër nuk dëshiron kompromis, por vetëm një shtet të pavarur. E vetmja gjë që ata duan është që bashkësia ndërkombëtare të bëjë presion ndaj Serbisë, si rezultat i së cilës Beogradi do ta njohë Kosovën. Kjo është e papranueshme për ne. Por në mënyrë që të arrihet një marrëveshje paqësore, Rusia dhe Kina, anëtarë të përhershëm të Këshillit të Sigurimit të OKB-së, duhet të përfshihen në këtë proces. Në fund të fundit, Këshilli i Sigurimit do të duhet të votojë për vendimin përfundimtar.”, u shpreh Daçiç.
Ai deklaroi se rezultati pozitiv i takimit të ardhshëm midis Presidentëve të SHBA-së dhe Rusisë, Joe Biden dhe Vladimir Putin, do të kontribuojë në një nivel më të lartë të besimit dhe bashkëpunimit ndërkombëtar.
“Ne besojmë se do të jetë shumë e dobishme për të gjithë të zvogëlojnë tensionin në marrëdhëniet midis Rusisë dhe Shteteve të Bashkuara”, tha Daçiç në një intervistë me gazetën ruse “Izvestia”.
